„Деца на светот“ во Гевгелија на 30 март – тажна комедија за љубовта, осаменоста и копнежот

Љубителите на театарот во Гевгелија на 30 март 2026 година ќе имаат можност да ја проследат претставата „Деца на светот“, тажна комедија од Стефан Цанев, во режија на Васил Михаил.

Претставата ќе се игра во понеделник, 30 март, со почеток од 20:00 часот, а влезот изнесува 200 денари. Билетите веќе се пуштени во продажба во просториите на Народниот театар во Гевгелија.

Станува збор за тивка, длабоко човечна приказна за љубовта што останува кога децата заминуваат, за надежта што не згаснува и за празнината што знае тивко да боли.

Во мала кафеана, еден брачен пар живее меѓу навика, тишина и чекање. Нивното секојдневие се менува со доаѓањето на неочекувана посетителка, која внесува нова динамика во нивниот свет. „Деца на светот“ е претстава што зборува за осаменоста, блискоста и копнежот по оние што се далеку — нежна, горчливо-смешна приказна што лесно допира до публиката.

Во улогите настапуваат Оливера Аризанова, Коста Ангов и Анкица Бенинова.

Во креативниот тим се:
драматург Ацо Гогов,
превод Коста Ангов,
сценографија и плакат Никола Пијанманов,
костимографија Ванчо Василев,
музички соработник Боби Ѓошиќ.

Продукцијата е на НУЦК „Антон Панов“ – Струмица.

Претставата е со препорачана возраст 14+.

За сите што сакаат квалитетна театарска вечер исполнета со емоција, тивка драма и препознатлива човечка блискост, „Деца на светот“ е претстава што вреди да се погледне.